Уур амьсгалын өөрчлөлтийн тухай НҮБ-ын суурь конвенцын Парисын хэлэлцээрийг Монгол Улс 2016 онд соёрхон баталсан. Тус хэлэлцээрийн дагуу гишүүн улсууд хүлэмжийн хийн ялгарлыг бууруулах үндэсний зорилтоо тодорхойлон, хэрэгжүүлэх үүрэг хүлээсэн.
Парисын хэлэлцээр 2020 оноос хэрэгжиж эхэлсэн. Ингэснээр НҮБ-ын гишүүн улсууд уур амьсгалын өөрчлөлтийг бууруулахад тодорхойлсон хувь нэмрийг шинэчлэн тодорхойлж, таван жил тутам зорилтоо ахиулж, хэрэгжилтийг тайлагнах үүрэгтэй.
Энэ хэлэлцээрийн хүрээнд манай улс хүлэмжийн хийн ялгарлыг бууруулах, уур амьсгалын өөрчлөлтөд дасан зохицох бодлого хэрэгжүүлж байна. Жишээ нь нийгмийн хамгааллын салбарын хувьд уур амьсгалын өөрчлөлтийн дасан зохицлын зорилтыг хэрэгжүүлэхээр иргэдийн амьжиргаа, нийгмийн хамгаалал холбоотой зорилтуудыг тусгаж хэрэгжүүлж байгаа юм.
Өчигдөр уур амьсгалын өөрчлөлтийг сааруулах, дасан зохицоход чиглэсэн үйл ажиллагааг Нийгмийн хамгааллын салбарын Нийгмийн даатгал, хөдөлмөр эрхлэлт, нийгмийн халамжийн бодлого, үйл ажиллагаатай уялдуулах үндэсний тодорхойлсон хувь нэмрийн зорилтыг шинэчлэх, баримт бичигт тусгах асуудлаар хамтран ажиллах талаар санал солилцлоо.
