ШШГЕГ-ын харьяа 441 анги буюу Ганц худгийн хорих ангиас дамжин өнгөрүүлэх 401 ангид хүргэгдсэн очсон Н.Энхбаяр одоо болтол эмчилгээ хийлгээгүй байгаа гэдгийг МАХН-ын дарга Г.Шийлэгдамба хэллээ. Уг нь, түүнийг эмчлэх шаардлагатай гэсэн эмчийн дүгнэлт гарсан. Үүний дагуу түүнийг шинээр тохижуулсан хоёрдугаар эмнэлэгт хүргэгдэн ирнэ гэж байсан ч одоо болтол авчраагүй байгаа юм. Харин хорихын нэгдсэн эмнэлэг буюу 401 ангид аваачсан ч Н.Энхбаяр эмчилгээ хийлгэхгүй гэдгээ хэлжээ. Тиймээс одоо болтол түүнд ямар нэгэн эмчилгээ хийгээгүй байгаа аж.
Мөн түүнийг хоёрдугаар эмнэлэгт авчрахгүй байгаа шалтгаан нь прокурорын байгууллагатай холбоотой гэнэ. МАХН-ын Ерөнхий нарийн бичгийн дарга Г.Шийлэгдамба, “Хүний эрүүл мэндийн асуудалд прокурорын байгууллага оролцох ёсгүй. Прокурор хүний эрүүл мэндийг хянадаг болсон нь эргэлзээ төрүүлж байна” гэж байр сууриа илэрхийлсэн юм.