Саяхан Монголын Залуучуудын Холбооноос “Авлигагүй орон сууц” төслийг хэрэгжүүлэхээр болж, олон нийтийн мэдээллийн хэрэгслээр энэ төсөлд оролцох барилгын компаниудын дунд тендер зарлаж байгаа мэдээлэл цацагдах боллоо. Энэ тендерт оролцох сонирхолтой барилгын чиглэлээр үйл ажиллагаа явуулдаг олон компаниуд хандаж байгаа сураг байна. Учир нь манайд анх удаа авлигагүйгээр орон сууцны үнэ хэрхэн өөрчлөгдөж болохыг телевизийн реалити нэвтрүүлэг зохион байгуулах замаар олон нийтэд харуулах, жишиг тогтоох, тодорхой тооны залуучуудыг хямд орон сууцаар хангах мөн барилгын салбарт шинээр орж ирж байгаа залуу компаниудыг дэмжих зорилготойгоор хэрэгжүүлж байгаа нь “Авлигагүй орон сууц” төслийн онцлог юм байна. Монголын залуучууд өөрсдөө санаачилаад, хамтран ажиллаж бүтээгээд, залучуудыгаа орон сууцжуулах хөтөлбөрийг эхэлж байгаа нь сайшаалтай юм. Хамгийн гол нь барилга баригдаж байгаа бүхий л үйл явц олны нүдэн дээр ил явагдах учир нэг талаасаа сонирхолтой, нөгөө талаасаа хамгийн бодитой шоу нэвтрүүлэг байх нь ээ. “Авлигагүй орон сууц” төслийг МЗХ Барилга хот байгуулалтын яам, Эрчим хүчний яамтай хамтарч хийх бөгөөд харин аль телевизээр цацагдах нь одоогоор нууц байгаа юм байна.