Цаг уур орчны шинжилгээний газраас гаргасан урьдчилсан мэдээгээр энэ сарын 20, 21-нд төв болон зүүн зүгийн нутгаар бага зэргийн цас орж, явган шуурга шуурна. Салхи 21-нд зүүн зүгийн нутгаар секундэд 12-14 метр хүрч ширүүснэ.
Харин Увс нуурын болон Дархадын хотгор, Идэр, Тэс, Буянт, Ерөө, Хараа, Туул, Тэрэлж, Хэрлэн, Онон, Улз, Халх голын сав газраар шөнөдөө 34-39 хэм, өдөртөө 22-27 хэм хүйтэн байна. Говийн нутгийн баруун хэсгээр шөнөдөө 16-21 хэм, өдөртөө 4-9 хэм, бусад нутгаар шөнөдөө 24-29 хэм, өдөртөө 13-18 хэм хүйтэн байна. Хугацааны сүүлчээр өдөртөө хүйтний эрч суларна.