Хятадуудаас авилга авсан гэх хөдөлгөөнт эргүүлийн цагаад Н.Раднаабазар нарыг өнөөдөр Баянгол дүүргийн шүүхэд шүүнэ. Тэднийг албан тушаалаа урвуулан ашиглаж хятадуудаас их хэмжээний мөнгө авилгад авсан хэргээр буруутгаж байгаа юм. Тодруулбал, хятадууд хууль бусаар их хэмжээний самар ачиж яваа гэх мэдээллийг иргэд цагдаагийн байгууллагад ирүүлсэн аж. Гэтэл энэ хэргийг таслан зогсоох бус хэргийн газар очсон цагдаа нар хятадуудтай хуйвалдаж, хэргийг нууна гэж 40 сая төгрөг авсан аж. Тиймээс тэдэнд Эрүүгийн хуулийн тусгай ангийн 268.2-р зүйл ангиар буруутгаж байгаа юм байна.  Энэ зүйл ангид, “Энэ хэргийг хясан боогдуулах замаар, эсхүл давтан буюу урьд хээл хахуулийн хэрэгт шийтгүүлсэн этгээд, түүнчлэн зохион байгуулалттай бүлэг, гэмт бүлэглэл үйлдсэн, эсхүл их буюу онц их хэмжээний хээл хахууль авсан бол эд хөрөнгийг хурааж, таваас дээш арван жил хүртэл хугацаагаар хорих ял шийтгэнэ” гэж заажээ.