-Захирагчийн ажлын албаны салбар нэгжийг дүүргүүдэд байгуулж байгаа. Сул орон тоо бий болголоо гэх нэгэн ч байна.  Энэ нэгжүүд ямар үүрэгтэй  юм бэ?
-Засаг даргын мөрийн хөтөлбөрт гэр хорооллыг дахин төлөвлөж, дэд бүтцэд холбох зорилт дэвшүүлснийг та бүхэн мэдэж байгаа байх. Энэ ажлыг газар дээр нь зохион байгуулж, хэрэгжүүлэх гол дам нуруу нь дүүргүүдэд  байгуулсан ЗАА-ны салбар нэгж юм. Тиймээс Улаанбаатар хотын алслагдсан гэр хороололд хотын захирагчийн ажлын алба байгуулсан. Одоогийн байдлаар Дамбадаржаа, Дарь эх, Баянзүрх гээд арван захирагчийн ажлын албаны даргыг нь томилон, ажлыг нь эхлүүлэх гэж байна.
-Энэ салбар нэгж маань хэдэн хүний бүрэлдэхүүнтэй ажил үүргээ гүйцэтгэх юм бэ?
-Одоогоор хоёр хүний орон тоотой байна. Ажлын албаныхан дахин төлөвлөлтөд багтсан гэр хорооллын иргэдтэй очиж уулзан, бодлого төлөвлөгөөгөө танилцуулах учиртай юм. Өөрөөр хэлбэл, Улаанбаатар хотын захирагчийн бүрэн эрхийнхээ хүрээнд хэрэгжүүлдэг чиг үүргийг тухайн орон нутагтаа хийнэ гэсэн үг. Хорооны Засаг дарга захиргааны ажилтан гэж явдаг бол ЗАА-ны дүүрэг дэх салбар нэгжийн ажилтан хот, нийтийн аж ахуйн асуудлыг хариуцдаг аж ахуйн ажилтан. Тэгэхээр хот нийтийн аж ахуйг хөгжүүлэх, үйлчилгээгээ иргэддээ ойртуулах үүднээс энэ арван ажлын албыг байгуулж байгаа юм.
-Дахин нэмж салбар нэгж  байгуулах уу. Хэзээ ажилдаа орох юм бол?
-Цаашдаа бусад газарт ч ажлын алба байгуулна. ЗАА-ны дүүрэг дэх 10 салбар нэгжийн ажилтнууд эхнээсээ ажилдаа орчихсон, иргэдтэйгээ уулзаад дахин төлөвлөлтөөр гудамж, талбайгаа яаж тохижуулах талаар саналыг нь сонсч эхэлсэн.