Интерполоор хайгдаж байгаа гэх Т.Аятунгаагийн хүүхдийг Монгол Улс авч чадах уу, үгүй юу гэдэг нь эргэлзээ төрүүлж байна. Монголын төр Т.Аятунгаад түр хүлээж бай гэсэн хариу өгсөн тухай хүүхдээ алдсан эх Т.Аятунгаа өчигдөр твиттерээр дамжуулан хэлсэн. Тэгвэл Тэргэлсар охиныг эх оронд нь авчрах талаар ямар арга хэмжээ авч байгаа талаар Хүний эрхийн үндэсний комиссын гишүүн П.Оюунчимэгээс тодруулахад, “Энэ мэдээлэл хэвлэл мэдээллийн хэрэгслээр цацагдахаас өмнө манай байгууллагад ирсэн. Үүний дагуу бид холбогдох арга хэмжээ авч байна. Тухайлбал, Филлиппин улсын Хүний эрхийн байгууллагад хандаж Тэргэлсар охиныг эх оронд нь авчрах тал дээр хамтран ажиллаач гэдгээ албан ёсоор илэрхийлсэн. Хараахан хариу ирээгүй байна. Манай улсын хүний эрхийн комисс, Филлиппин улсын хүний эрхийн байгууллагууд олон улсын өмнө хүлээсэн үүргээ биелүүлэн ажиллах байх. Үүний хүрээнд Тэргэлсар охиныг эх оронд нь авчрах талаар хамтран ажиллах байх” гэсэн хариу өглөө.