Нийслэлийн нийтийн зориулалттай өмчийн тооллого удахгүй эхлэх гэж байгаатай холбогдуулан Нийслэлийн Засаг даргын А/163 дугаартай захирамж гарлаа. Захирамжийн дагуу нийслэлийн Өмчийн харилцааны газрын дарга Ш.Төмөрбаатараар ахлуулсан нийслэлийн Хөрөнгө оруулалтын газрын дарга Д.Нарантуяа, Авто замын газрын дарга Д.Нанзаддорж, Хот тохижилтын газрын дарга Д.Энхсайхан нарын 20 гаруй хүний бүрэлдэхүүнтэй ажлын хэсэг нийтийн зориулалттай өмчийн тооллогын ажил явуулах журмын төслийг боловсруулж, тооллогын ажлыг зохион байгуулахаар болжээ. Энэ ажлын хүрээнд нийслэл, дүүргийн гудамжны нэр хаягийн судалгаа гаргах, дүүрэг, хороодын хилийн цэс тогтоох, нийслэлийн хэмжээний авто зам, хөшөө  дурсгалын  болон нийслэлийн нутаг дэвсгэр дэх улс, нийслэл, дүүргийн төсвийн хөрөнгө оруулалт  болон хандив, зээл, тусламж, төсөл хөтөлбөрөөр бий болсон гүний худаг, услалтын системийн судалгааг гаргах юм.