Нийслэлд жижиг дунд үйлдвэрлэлийг хөгжүүлэхэд иргэдийн оролцоог  нэмэгдүүлэх зорилтыг хотын Засаг дарга Э.Бат-Үүл мөрийн хөтөлбөртөө тусган ажиллаж байгаа билээ. Хувиараа бизнес эрхлэх, жижиг дунд үйлдвэрлэл явуулах сонирхолтой ч энэ талаарх мэдлэг, мэдээлэл дутмагаас шалтгаалж мөрөөдлөө биелүүлэн бизнесээ эхлүүлж чадахгүй олон иргэн нийслэлд амьдарч байгаа. Тэгвэл энэ хэрэгцээ шаардлагыг бага ч гэсэн хангах зорилгоор Нийслэлийн Ардчилсан Нам, “Жижиг дунд үйлдвэрлэлийг дэмжих төв” НӨҮГ-тай хамтран төсөл хэрхэн бичих, маркетингийн төлөвлөгөө яаж боловсруулж бизнесээ эхлүүлэх, өргөжүүлэх талаар нийслэлийн есөн дүүргийн иргэдийг хамруулсан сургалтыг энэ сарын 2-ноос ирэх дөрөвдүгээр сарын 12-ныг хүртэл шат дараатайгаар зохион байгуулж байна. Одоогоор нийслэлийн есөн дүүргийн 70 гаруй жижиг дунд үйлдвэрлэл эрхэлдэг болон эрхлэх хүсэлтэй иргэд, АН-ын дэмжигч гишүүд хамрагдаад байгаа аж. Сургалтад хамрагдаж амжилттай оролцсон хүмүүст Улаанбаатар хотын бизнес хөгжлийн төвөөс албан ёсны сертификат олгох юм байна.