Ахмад настан, хөгжлийн бэрхшээлтэй иргэд энэ сард багтаан “Хүний хөгжил сан”-гаас олгох 330 мянган төгрөгөө авч дуусах юм байна. Нэг хэсэг санхүүгийн эх үүсвэр байхгүй гэсэн шалтгаанаар олгохгүй байсан эл мөнгийг шинэ оны өмнөхөн өгч эхэлсэн билээ. Сангийн сайд Ч.Улаан “Ахмад настан, хөгжлийн бэрхшээлтэй иргэдийн олонхи нь өнгөрсөн нэг, хоёрдугаар сард мөнгөө авсан. Гуравдугаар сард багтааж, энэ мөнгийг авах ёстой бүх хүнд олгож дуусна. Ганцхан асуудал байж магадгүй. Тухайлбал, иргэний бичиг баримтын зөрчлөө арилгаагүй иргэд энэ үйл ажиллагаанд хамрагдаж чадахгүй үлдсэн байж болзошгүй. Тийм зүйл байгаа бол иргэнийхээ үүргийг биелүүлж, бичиг баримтынхаа зөрчлийг шуурхай арилгах хэрэгтэй. Тэгээд ч энэ мөнгийг улсын төсвөөс олгохоор эх үүсвэрийг нь бүрэн шийдвэрлэсэн” гэлээ.