“Монголиан эйрлайнз” компанийн зах зээлд ашиглаж байгаа лого, нэрний бичиглэл нь Өрсөлдөөний тухай хуулийг зөрчсөн гэж үзжээ. Өөрөөр хэлбэл, энэ компанийн ашиглаж байгаа лого, таних тэмдэг нь иргэдийг төөрөгдүүлсэн, өрсөлдөгч компанийнхаа нэр хүндэд халдсан үйлдэл гэж үзжээ.
Уг нь, Монголиан эйрлайнз компанийн хувьд 2011 онд байгуулагдсан хэрнээ онгоцныхоо лого дээр 1956 онд үүссэн мэтээр бичсэн дээрх зөрчил гаргахад хүргэсэн гэдгийг ШӨХТГ-ынхан хэлж байна. Тиймээс тус компанийг зөрчлөө арилгах шаардлагыг тавьсан байна.
МИАТ болон Монголиан эйрлайнз компанийн хооронд асар том ялгаа байгаа. Тодруулбал, МИАТ компани 1956 онд байгуулагдаж саяхан Засгийн газрын шийдвэрээр үндэсний агаарын тээвэрлэгч гэх статус хүртсэн. Харин Монголиан эйрлайнз компанийн тухайд гэвэл хоёр жилийн өмнө байгуулагдсан юм. Гэхдээ МИАТ компанийн гадаад нэрийг зөвшөөрөлгүйгээр “зээлдсэн”. МИАТ-ийн гадаад нэрийг эргүүлэн авах саналыг ШӨХТГ-ынхан анх удаа гаргаж байгаа юм биш. Өмнө нь, УИХ-ын хэд хэдэн байнгын хорооны хуралдаанд оруулж, нэрээ буцаан авахыг удирдлагуудад нь өгч байсан юм.