Францын нийслэл Парист ижил хүйстний гэрлэлтийг эсэргүүцсэн томоохон жагсаал цуглаан боллоо. Жагсаалд оролцсон 300 мянга гаруй иргэн ижил хүйстнүүдийн гэр бүлийг хуулийн дагуу батлах, хүүхэд үрчлэн авахыг нь хүлээн зөвшөөрөхийг эсэргүүцэж байгаа юм. Энэ тухай хуулийг Францын Сенат ирэх сард хэлэлцэх бөгөөд эцсийн шийдвэр гарахаас урьтаж ийнхүү эсэргүүцлээ илэрхийлж байгаа аж. Учир нь, Францын парламентын доод танхим ижил хүйстний гэрлэлтийг хүлээн зөвшөөрөх тухай хуулийг аль хэдийнэ баталчихаад байгаа бөгөөд одоо Сенат батлах үлдээд байгаа юм. 

Эсэргүүцлийн жагсаал эхэндээ тайван байсан ч 100 гаруй залуус цагдаагийн хамгаалалтын сэтлэх гэж оролдсоны дараа байдал хурцдаж, цагдаа, иргэдийн хооронд мөргөлдөөн үүсчээ. Цагдаа нар жагсагчид руу нулимс асгаруулах хий цацаж, байдлыг намжаах гэж оролдсон байна. Харин уурссан жагсагчид жагсаалын гол зорилго болох ижил хүйстний гэрлэлтийн тухай асуудлаас давж гарч, Ерөнхийлөгч Ф.Олландыг огцрохыг шаардаж эхэлжээ. Тэд Ф.Олландын бодлого, зарчим буруугаар яваад байна хэмээн шүүмжилжээ.

Жагсагчдын дийлэнх нь консерватив үзэлтнүүд байсан бөгөөд ижил хүйстнүүдийн гэрлэлтийг хүлээн зөвшөөрснөөр уламжлалт гэр бүлийн ёс алдагдаж, полигами гэр бүл үүсэх эхлэх тавигдана гэж үзэж байгаа аж.