Хар тамхи хадгалсан, борлуулсан, нуун дарагдуулсан гэх хэрэгт сэжиглэгдэж урьдчилан хорих төвд саатуулагдаж байх үедээ түлэгдсэн “Дижитал” хамтлагийн ахлагч Ш.Батбаяр буюу Бааварын түлэгдсэн шалтгааныг Шүүхийн шинжилгээний үндэсний төвийн шинжээчид тогтоожээ.
Шинжээчдийн дүгнэлтээр, “Тусгаарлах өрөөнд гарсан галын байдал, шаталтын явцыг харахад ил гал гарчээ. Ил гал гэдэгт лаа, зул, бамбар, тамхи, чүдэнзний болон халуун цогтой үнс нурам, тамхины асаагуурын гал зэрэг ордог. Галын голомт нь өрөөний баруун урд буланд байсан орны толгойн орчимд болон ханын хэсэгт байна. Өрөөний гэрэлтүүлэг ханандаа бэхлэгдсэн, зузаан шилэн бүрхүүлтэй, гал гарсны дараа ч хэвийн ажиллаж байна. Мөн хяналтын камерын утсыг далд монтажаар хийсэн учраас ил гал авалцах боломжгүй тул хорих өрөөнд гарсан гал нь хүний үйл ажиллагаанаас үүдэлтэй” гэсэн дүгнэлт гаргасан байна.
Тэгэхээр гал цахилгааны утаснаас гараагүй гэдэг нь батлагдаж байна. Тэгвэл хэвлэл мэдээллээр мэдээллээд байгаачлан түүнийг тусгаарласан өрөөний үүднээс олдсон гэх цэнхэр өнгийн асаагуур түүнийх болж таарах нь.