“Саусгоби сэндс” компанийн хүчингүй болгосон тусгай зөвшөөрлийн нэгийг найзынхаа компанид шилжүүлсэн хэрэгт буруутгагдаж анхан шатны шүүхээс 6.6 жилийн ял сонссон АМГ-ын дарга асан Д.Батхуягийн гомдлыг нийслэлийн шүүх энэ сарын 15-нд хэлэлцэхээр болжээ. Д.Батхуягт Эрүүгийн хуулийн 263 дугаар зүйлийн 263.2, 268 дугаар зүйлийн 268.2 дахь хэсэгт зааснаар төрийн албанд ажиллах эрхийг гурван  жилээр хасч, таван сая төгрөгний эд хөрөнгө хурааж, 6 жил 6 сар хорих ял оногдуулж,  хорих ялыг чанга дэглэмтэй хорих ангид эдлүүлэхээр шийдвэр анхан шатны шүүхээс гарсан юм. Харин түүний хамтрагч гэх Л.Даваацогтыг Эрүүгийн хуулийн 263 дугаар зүйлийн 263.2, 268 дугаар зүйлийн 268.2 дахь хэсэгт зааснаар төрийн албанд ажиллах эрхийг хоёр жилээр хасч, гурван сая төгрөгний эд хөрөнгө хурааж, 6 жил хорих ял оногдуулж, хорих ялыг чанга дэглэмтэй хорих ангид эдлүүлэхээр, С.Жаргалсайхан, Ш.Бат-Ирээдүй нарыг Эрүүгийн хуулийн 268 дугаар зүйлийн 268.2 дахь хэсэгт зааснаар тус бүр гурван сая төгрөгний эд хөрөнгө хурааж, 5 жил 1 сар хорих ял оногдуулж, хорих ялыг жирийн дэглэмтэй хорих ангид эдлүүлэхээр тус тус тогтоосон юм.