ЗХЖШ-ын Агаарын довтолгооноос хамгаалах цэргийн командлагч асан, бригадын генерал Т.Дашдэлэгийг “МИГ-21” онгоцны моторыг хойд Солонгосын талд худалдсан байж болзошгүй гэж үзэн АТГ-аас эрүүгийн хэрэг үүсгэн шалгаж байгаа билээ. Мөн түүнтэй хамт иргэн н.Бямбаноров, н.Нацагдорж нарыг ч шалгаж байгаа юм. Умард Солонгосоос авсан 1.5 сая ам.долларыг хувьдаа завшсан байж болзошгүй гэж эрүүгийн хэрэг үүсгэсэн энэ хэргийн талаар АТГ-аас мэдээлэхдээ, “Энэ хэргийн мөрдөн байцаалтын ажиллагаа явж байгаа. Генерал Т.Дашдэлэг энэ мөнгөний тал хувь буюу 670 гаруй сая төгрөгийг барагдуулсан. Хохирол барагдууллаа гээд хэргийг хэрэгсэхгүй болгохгүй. Зохих ёсны хариуцлага хүлээх ёстой” гэсэн тайлбар өгөв. Гэхдээ хохирол барагдуулсан ч ялын хэмжээнд өөрчлөлт орох магадлалтай гэдгийг албаныхан хэлж байв.