ХАХНХЯ-наас зарлаж буй “Оролцоог бодит болгоё” сарын аянд баянголчууд нэгдэн нэлээд ажлыг санаачлан зохион байгуулж байна. Энэ хүрээнд хөгжлийн бэрхшээлтэй хүүхдүүдийг энгийн хүүхдүүдтэй ижил орчин нөхцөлд сургахыг уриалж, ерөнхий боловсролын сургуулийн захирал, цэцэрлэгийн эрхлэгч нарын дунд сургалт зохион байгуулан мөн хөгжлийн бэрхшээлтэй иргэдийн бүтээлийн үзэсгэлэн худалдааг хоёр дахь удаагаа хийлээ. Энэ удаад 20 гаруй аж ахуй нэгж, хувь хүн уг үзэсгэлэн худалдаанд оролцож, 50 гаруй нэр төрлийн бараа бүтээгдэхүүн дэлгэн тавьжээ. УИХ-ын гишүүн С.Одонтуяа, НИТХ-ын төлөөлөгч Л.Нарантуяа мөн Баянгол дүүргийн Засаг дарга Д.Оросоо, Засаг даргын орлогч П.Цэцэгмаа нар хүрэлцэн ирж үзэсгэлэн худалдааг нээлээ. “Оролцоог бодит болгоё аян” энэ долоо хоногийн турш хүүхдүүдийн оролцоог дэмжин үргэлжлэх бол энэ сарын 24-нд нэгдсэн чуулганаа хийх ажээ.