“Хансуун зам”, “Жигүүр гранд” ХХК-иуд газар шорооны ажил хийж байхдаа цахилгааны гол кабель шугамууд гэмтээж ойр орчмынх нь иргэдийг хохироосон тохиолдол өнгөрсөн өдрүүдэд гарлаа.
Тодруулбал “Хансуун зам” ХХК нь нийслэлийн Баянгол дүүргийн нутаг дэвсгэрт замын өргөтгөл, шинэчлэлийн ажил хийж байхдаа Эх хүүхдийн эрүүл мэндийн үндэсний төвийг цахилгаанаар тэжээдэг 10 кВ-ын кабель шугамыг энэ сарын 23-ны шөнийн 02 цаг 30 минутын үед механикаар гэмтээсний улмаас тус төв болон III хорооллын иргэдийг 2 цагийн туршид цахилгаангүй болгож, улсад 1 сая 500 гаруй мянган төгрөгийн хохирол учруулсан. Мөн “Жигүүр гранд” ХХК нь нийслэлийн Хан-Уул дүүргийн 15 дугаар хорооны нутаг дэвсгэрт энэ сарын 23-ны өдрийн  10 цагийн орчимд газар шорооны ажил хийж байгаад 6 кВ-ын кабель шугамыг гэмтээсний улмаас Нархан, Жаргалан, Элит, МҮХАҮТ, Рапид харш хорооллын цахилгаан хангамжийг 2 цагийн турш тасалдуулжээ. “Жигүүр гранд” ХХК-ийн буруутай ажиллагааны улмаас улсад учирсан хохирлын хэмжээг тооцож, төлбөр ногдуулахаар УБЦТС ХК-ийн Эрчим хүчний улсын байцаагчид ажиллаж байна.
Удахгүй Улаанбаатар хотод Ардчилсан орнуудын хамтын нийгэмлэгийн сайд нарын YII бага хурал зохион байгуулагдахтай холбогдуулан иргэд, аж ахуйн нэгжүүд барилга, газар шорооны болон аливаа ажлыг явуулахдаа газар доор болон агаарт бэхлэгдсэн инженерийн байгууламжуудыг санамсар болгоомжгүйгээс гэмтээж, нийслэлийн иргэдийг болон гадны зочид байрласан томоохон объектуудын цахилгаан хангамжид нөлөөлж болзошгүйг сэрэмжлүүлж байна.
Д.Цэнгэлмаа