Ардчилсан орнуудын хамтын нийгэмлэгийн чуулганд оролцох зочид төлөөлөгчид өнөөдөр манай улсад ирж байна. Тэднийг угтаж нийслэлийн нүүр царайг өөрчлөх ажил ид өрнөж байна. Машинуудын дугаарыг тэгш сондгойгоор нь хязгаарласан болохоор хотын төв харьцангуй хөдөлгөөн багатай иргэд ч таатай байна. Зочид төлөөлөгчдийн аюулгүй байдлыг хангах үүднээс хотын төвөөр цагдаагийн албан хаагчид эргүүлд гарсан байна. Морьтой эргүүл, явган эргүүл гээд хотын төв зам дагуух гудамж талбайд эргүүлийн цагдаа нар ажиллаж байна. Харин нийслэлийн өнгө төрхийг тодорхойлдог томоохон барилга байшингуудын гадна хогийн сав, сандал суурьлуулж, гадна өнгийг нь сэргээн будаж, шохойдох ажил хийж байна. Иргэдийн хувьд дандаа ийм байдаг болоосой гэж ярьцгааж байв.