АНУ-ын Огайо мужийн Цинциннати хотын католик шашны эрэгтэйчүүдийн сургуулийн сурагч хичээл дээр сууж байгаад гэнэт гар буу гаргаж ирээд тархи руугаа буудсан байна. Эхний цагийн энэ хичээлийн үеэр ангид 22 хүн байжээ. Ангийнхан нь цагдаа, түргэн тусламж  дуудаж, зарим нь айсандаа ангийн булан руу хуйларч нуугдахыг оролджээ. Хүү амьд үлдэж эмнэлэгт хүргэгдсэн байна. Эргэн тойрны хүмүүст ямар нэг аюул учраагүй, хүү юунаас болж амиа хорлохыг оролдсон тухай мэдээлэл алга гэж хууль сахиулагчид хэлжээ. Цагдаагийн дарга Барт Вест хүүг хагас автомат гар буугаар өөрийгөө буудсаныг хэлээд харин яаж сургууль дээрээ буу авчирсныг тодорхой хэлээгүй байна. Багш нар, ангийнхан нь хүүг онц сурдаг, нийгмийн идэвхтэй хүүхэд гэжээ.