Нийслэлийн удирдлагын зөвлөлийн өнгөрсөн долоо хоногт болсон хуралдаанаар барилгын салбарын хөдөлмөр хамгаалал, аюулгүй ажиллагааны чиглэлээр мэргэжлийн хяналтын байгууллагаас хийж буй ажлын явц, цаашид авах арга хэмжээний талаар хэлэлцсэн юм. Энэ үеэр, нийслэл хотод барилга, бүтээн байгуулалтын ажлыг хийж, гүйцэтгэж байгаа аж ахуйн нэгж байгууллагууд хөдөлмөр аюулгүй байдлыг хангаагүйгээс болж эрдэнэт хүний амь нас эрсдэх явдал гарсаар байгаа учраас барилгын салбарт тавих мэргэжлийн хяналтыг чадавхжуулахаас гадна далайцтай зохион байгуулалтын хэд хэдэн ажил хийх хэрэгтэй байгаа тухай удирдлагын зөвлөлийн гишүүд саналаа хэлсэн юм. Мөн барилгын талаархи төрийн бодлогыг нийслэлийн нутаг дэвсгэрт хэрэгжүүлэх, иргэдийн эрүүл аюулгүй орчинд амьдрах нөхцлийг хангах зорилгоор нийслэл хотод барилгын салбарын хөдөлмөр аюулгүй байдлыг ханган ажиллах тухай нийтлэг журам боловсруулж, НИТХ-аар хэлэлцүүлэх үүргийг холбогдох албаныханд өгсөн билээ.
Энэ үүргийн дагуу нийслэлийн Засаг даргын захирамжаар “Нийслэлийн нутаг дэвсгэрт барилгын үйл ажиллагаа эрхлэхэд хөдөлмөр хамгаалал, аюулгүй байдлыг хангах нийтлэг журам”-ын төсөл боловсруулах Ажлын хэсгийг байгууллаа. Ажлын хэсэг энэ долоо хоногт болох Удирдлагын зөвлөлийн хуралдаанаар журмын төслөө танилцуулна гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.