Лондоны Кингс коллежийн судлаачид астма буюу гуурсан хоолойн багтраа өвчин хүндрэх нэг шалтгаан хүний биед витамин Д дутагдсантай холбоотой байдаг хэмээн дүгнээд байна. Тийм ч учраас гуурсан хоолойн багтраатай өвчтөнүүд витамин Д хэрэглэж байвал эрүүл мэндэд нь тустай гэж зөвлөж байна. Гэхдээ байнга эм тариа хэрэглэдэг өвчтөнүүдийн хувьд эм танд тийм ч сүжигтэй ханддаггүй. Тиймээс эмгүйгээр витамин Д-г биедээ шингээх хамгийн сайн арга болох нарны гэрэлд хангалттай хугацааг өнгөрүүлвэл өвчнөө хүндрүүлэхгүй байж болно гэж мэргэжилтнүүд үзэж байгаа аж. Гэхдээ энэ зөвхөн судалгааны түвшинд яригдаж байгаа бөгөөд Д витамин астма өвчний эсрэг ямар үйлчлэл үзүүлэхийг тухайлан судалж, шинжилж эхлээгүй байгаа юм байна. Витамин Д нь зөвхөн астма гэлтгүй нийтдээ харшилтай хүмүүст сайнаар нөлөөлдөг ажээ. Учир нь, уг витамин хүний дархлалын систем дэх хэт идэвхжиж мэдрэгшсэн хэсгийг тайвшруулж, намжаах үйлчилгээ үзүүлдэг байна.