Цагдаагийн ерөнхий газраас сүүлийн үед хэвлэл мэдээллээр гарч, олон нийтийн анхааралд байгаа хэргүүдийн талаар мэдээлэл өглөө.
Сонгинохайрхан дүүргийн нутаг дэвсгэрт байрлах Орчлон хорооллын орон сууцны байранд гал гарч оршин суугчдад их хэмжээний хохирол учирсан хэрэг гарсан билээ. Тэгвэл энэ галын дүгнэлтийг мэргэжлийн байгууллага гаргажээ. Гал гарсан шалтгааныг шинжээчид дүгнэхдээ дөрөвдүгээр давхрыг айлын тагтан дээр хураалттай байсан бараа руу гал гаргах боломжтой зүйл /тамхины иш/ хаяснаас үүдэн гал гарсан байж болзошгүй гэсэн дүгнэлтэд хүрчээ. Мөн гал их хэмжээгээр авалцсан барилгын дулаалгын хөөсөнцөр хавтан нь галд тэсвэргүй, галыг улам өдөөх материал болохоор гал тархах шалтгаан болсон гэдгийг шинжээчид тогтоожээ.