АНУ-аас Батаарыг авчрахтай зэрэгцэн Лениний музейд хадгалагдаж байсан үзмэрүүд болон үзмэрийн бүртгэлийн ерөнхий дэвтэр алга болсон гэх хэрэг гарч ирсэн. Энэ хэрэгт Мөрдөн байцаах газрын эдийн засгийн гэмт хэрэг мөрдөх хэлтэс Эрүүгийн хулуийн 150 дугаар зүйлийн 150.3-т зааснаар эрүүгийн хэрэг үүсгэн шалгаж байгаа аж. Энэ хэрэгт тухайн үед музейд ажиллаж байсан 26 хүнийг гэрчээр татан байцаажээ. Музейн үзмэрийн бүртгэлд гар бичмэл, захидал хэлсэн үг зэргийн хуулбарууд ном зохиол зэрэг үзмэрүүдээс бүрдэж байснаас гадна Үржиний бүтээл болох 10x4 хэмжээтэй зээгт наамал, цээж баримал, бусад барималууд зэрэг үзмэрүүд байсан нь тогтоогджээ. Лениний музей үзмэр болон бүртгэлийн ерөнхий дэвтэрийг МАН-ын хэрэг эрхлэх газраас шаардахад мөрдөн байцаалтад авчирч өгөөгүй, ямар нэгэн тайлбар гаргаагүй гэдгийг албаны эх сурвалж өгүүлэв. Тиймээс Үндэсний төв архиваас Лениний музейтэй холбоотой тайлбар, тайлан зэргийг хуулбарлан авч шалгалтын ажлыг хийж байгаа юм байна.