Сурагчдын зуны амралт хаяанд ирлээ. Нийслэлийн Хүүхэд, гэр бүлийн хөгжлийн газарт бүртгэлтэй 32 зуслан байдгаас энэ жил 22 нь үйл ажиллагаагаа явуулна гэдгээ албан ёсоор мэдэгдсэн билээ. Тэгвэл зуслангууд ирэх сарын 10-наас нэгдүгээр ээлжийн хүүхдүүдээ хүлээж авах гэнэ. Тус зуслангуудын бэлтгэл ажлыг Нийслэлийн Мэргэжлийн хяналтын газар, Эрүүл мэндийн газар, Нийслэлийн Цагдаагийн газар, Нийслэлийн Онцгой байдлын газрын төлөөлөгчөөс бүрдсэн ажлын хэсэг шалгаж эхэлжээ. Зуслангуудын төлбөрийн хувьд нэг ээлж /долоо хоног/ бага ангийн хүүхэд 125 мянга, дунд ангийн хүүхэд 130 мянга, ахлах ангийнхныг 145 мянган төгрөгөөр амраах саналыг Зуслангуудын нэгдсэн холбоо гаргаад байгаа аж.