Цагдаагийн ерөнхий газраас цахим гэмт хэрэгтэй холбоотой иргэдэд хандан сэрэмжлүүлэг гаргалаа.
АНУ, БНХАУ гээд хэд хэдэн улсын иргэдийн гар утсанд энэ сарын 19-21-нд +14166177531 дугаараас "Та ноён Мак Хилс болон хатагтай Синди Хилс нарын 1.5 сая ам.долларын хандив хүлээн авагчаар сонгогдлоо. Ингэхийн тулд та өөрийн бүтэн овог нэрээ hillsfamily105@gmail.com хаяг руу илгээх шаардлагатай" гэсэн утгатай мессэж иржээ. Энэ дугаараас манай улсын иргэдийн утсанд ч мессэж ирсэн аж.

Цагдаагийнхны мэдээлс­нээр +14166177531 дугаар нь Канад улсын Торонто хотод бүртгэлтэй юм байна. Өнгөрсөн оны арваннэгдүгээр сард АНУ-ын Миссоури мужид Мак Хилс, Синди Хилсийн гэр бүл "Powerball MOLottary" нэртэй сугалаанд түрүүлж 293.750.000 ам.доллар хожсонтой холбоотой дээрх мессэжийг түгээж байж болзошгүй гэнэ. Өөрөөр хэлбэл, цагдаагийн байгууллагынхан цахим гэмт хэрэгтнүүд тэдний гэр бүлийн мэдээллийг ашиглан цахим луйврын гэмт хэрэг үйлдэж байж болзошгүй гэж таамаглаж байна.

Цахим гэмт хэргийн энэ төрөл нь иргэдэд ямар нэг байдлаар сугалаанд санамсаргүй байдлаар хожсон, хэн нэгнээс их хэмжээний өв хөрөнгийг өвлөх болсон эсвэл их хэмжээний хандив хүлээн авагч боллоо гэх зэргээр хууран мэхэлж, хариуд нь хувь хүний мэдээллийг шаардан авдаг, улмаар тухайн мэдээллийг олон улсад гэмт хэргийн материал болгон ашигладаг аж. Тиймээс иргэд энэ төрлийн гэмт хэргээс урьдчилан сэргийлэх, хэн нэгэн этгээдэд өөрийн хувийн мэдээллээ алдахгүйн тулд илгээгч этгээд нь тодорхойгүй цахим шуудан, мессэж, түүгээр дамжсан вэб холбоосыг ашиглахгүй байхыг цагдаагийнхан анхааруулж байна.