МИАТ компанийн удирдлагууд өөр бусад байгууллагынхантай хамтран Дайны эрсдэлийн даатгал нэрийн дор их хэмжээний мөнгө завшсан хэргийг нийслэлийн Баянзүрх дүүргийн шүүх хэлэлцэх байсан ч хойшилсон байна. ШШГЕГ-ын харьяа цагдан хорин 401 дүгээр ангид болох байсан шүүх хурлыг шүүгдэгч, Коммер эрхэлсэн дэд захирал байсан Ч.Хоролсүрэн өмгөөлөгчөө сольсон учир, өмгөөлөгчдөд нь хавтас хэрэгтэй танилцах боломж олгох үүднээс ийн хойшлуулжээ.
Энэ хэрэгт МИАТ компанийн гүйцэтгэх захирал асан Б.Эрдэнэбилэг, Ц.Орхон,  коммер эрхэлсэн дэд захирал Ч.Хоролсүрэн, түүний дүү Ч.Суурьтогтох, “Монголиан эйртранспорт групп” компанийн захирал С.Батхишиг, “МИАТ” компанийн дэд захирал асан Р.Бат-Эрдэнэ, “Транстрейд Би Ди Си” банк бус санхүүгийн байгууллагын захирал Н.Гантөмөр, Голомт банкны “Солонго” салбарын захирал асан Г.Саранчимэг нарыг бусдын эд хөрөнгийг завшиж үрэгдүүлсэн, банкны тухай хууль тогтоомж зөрчсөн, мөнгө угаасан зүйл ангиар буруутган яллагдагчаар татсан юм.