“Дайны эрсдлийн сан” нэрээр МИАТ компаниар үйлчлүүлсэн хүн бүрийн тасалбар дээр 5 ам.доллар нэмж борлуулан, түүнийгээ даатгалын компанид шилжүүлсэн нэрээр хувьдаа их хэмжээний мөнгө завшсан МИАТ компанийн удирдлагуудыг шүүх хурал өнөөдөр Урьдчилан хорих 461 дүгээр ангид болно.
Эл шүүх хурал өнгөрсөн долоо хоногийн даваа гаригт болох байсан ч шүүгдэгч Ч.Хоролсүрэн хоёр өмгөөлөгчөө сольсон гэх шалтгаанаар шүүх хурлыг өнөөдөр болтол хойшлуулаад байсан юм.
Энэ хэрэгт холбогдуулан 2006-2011 оны хооронд МИАТ компанийн гүйцэтгэх захирлаар ажиллаж байсан Б.Бат-Эрдэнэ, Б.Эрдэнэбилэг, Ц.Орхон, дэд захирлаар ажиллаж байсан Ч.Хоролсүрэн, түүний дүү “Монголиан Эйрлайнс” группын захирал асан Ч.Суурьтогтох, тэдний үүсгэн байгуулсан компанийн нягтлан бодогчоор ажиллаж байсан Н.Гантөмөр, 1997-2007 оны хооронд “Голомт” банкны 6-р салбарын захирлаар ажиллаж байсан Г.Саранчимэг нарыг шүүх юм.