Нийслэлийн засаг дарга, Улаанбаатар хотын захирагч Э.Бат-Үүл Улаанбаатар метроны бүтээн байгуулалтын талаар Английн “Клад энд Ко” хуулийн байгууллагын хуульчид болох Дэвид Мур, Найжил Тайлор нартай интернэтээр шууд холбогдон ярилцлаа. “Клад энд Ко” компани “Улаанбаатар метро”-ны төсөлд Нийслэлийн ЗДТГ-тай хамтран ажиллах санал тавьснаар анхны уулзалтаа ийн цахим хэлбэрээр хийж байгаа юм. Анх удаа метротой болох гэж байгаа манай улсын хувьд мэргэжилтнүүдээс зөвлөгөө авах зүйл олон байлаа. Цахим уулзалтаар “Улаанбаатар метро”-ны хууль эрх зүйн зохицуулалтын талаар болон метрог байгуулахад тулгарч болох асуудлууд, гарч болох эрсдлийн талаар ярилцаж, зөвлөгөө авсан юм. Метрог Энхтайвны өргөн чөлөөний дагуу барьж, зорчих үнэ нь 500 төгрөгөөс эхлэнэ гэж төлөвлөж байна.