Хотдоо дугуйн зогсоолтой болох санал гаргасан “Хотын хөгжил ба залуусын оролцоо” клубт өнөөдөр 3000 гаруй залуус нэгдээд байна. Эдгээр залуус сайн дураараа хамтран өөрсдийн санхүү хөрөнгөөр Улсын их дэлгүүр, Улаанбаатар их дэлгүүр, Өргөө, Тэнгис кино театр, СТӨ зэрэг газарт дугуйн зогсоол шинээр байгуулаад байна. Тэд дугуйн зогсоол хийхдээ хотын мэр Э.Бат-Үүлд тус саналаа хэлж,  хотын удирдлагууд ч дугуйн зогсоол байгуулах газрын асуудлыг шуурхай шийдэж өгчээ.  
“Хотын хөгжил ба залуусын оролцоо” клубийн гишүүд цаашид гадаад орнуудын туршлага, стандартын дагуу хийсэн дугуйн замаас үлгэр жишээ авч Улаанбаатар хотдоо хэрэгжүүлэх зорилготой ажиллаж байна.
Улаанбаатар хотод өдөртөө 250 хүн дугуйгаар зорчдог гэсэн тоо бий. Ингэж дугуйн зориулалтын зогсоолтой болсноор цаашиад энэ тоо нэмэгдэх, хотын оршин суугчид эрүүл мэнддээ ээлтэй, хөдөлгөөнтэй амьдрах, улмаар байгаль орчинд хор хөнөөлгүй тээврийн хэрэгслээр зорчих эрүүл дадал зуршлыг хэвшүүлэх,  хотын соёлыг хөгжүүлэхэд том алхам болно гэж залуус үзэж байна.