Холливудын алдарт од Брэд Пит шинэхэн киноныхоо нээлтийг хийн дэлхийг тойрох хугацаанд түүний эхнэр  Анджелина Жоли өөрийн үүрэг болсон НҮБ-ын элчийн ажлаар Ойрхи Дорнодод ирээд байна. Жоли ядуурал туйлдаа хүрсэн, дайны халуун цэг болсон улс орноор нэг биш удаа явж байгаа билээ. Энэ удаад тэрээр Сирийн дүрвэгсэдтэй уулзахаар Иорданд ийн ирсэн аж.

Ямар ч гоёл чимэглэлгүй тун энгийн тэр л төрхөөрөө жүжигчин бүсгүй дүрвэгсэдтэй уулзаж, тэдний амьдралыг тэмдэглэж явна. Дайн гамшгаас болж Сирийн олон мянган хүүхэд үхэж үрэгдэж байгаа учраас тэрээр дэлхий нийтийн анхаарлыг энэ бүс нутагт хандуулахыг зорьжээ.  Жоли “Ойрхи Дорнод үнэхээр хүнд нөхцөлд байна. Энэ оны сүүл гэхэд Сирийн хүн амын тал нь буюу 10 сая хүн өөрийн нутаг дэвсгэрээ орхин гарахад хүрэх нь” хэмээн ярьсан байна. Тэрээр энэ онд хийх хүмүүнлэгийн ажлаа Ойрхи Дорнодод үргэлжлүүлэхээр шийдсэн гэнэ. Хүнд хагалгааны дараахи Жолигийн энэ байдал олон хүний үлгэр дууриалал болж буй аж.