ШӨХТГ-ын дарга О.Магнай сарын өмнө “Ажлаа хангалтгүй гүйцэтгэсэн” гэсэн шалтгаанаар Н.Гантөмөр, Ц.Тэрбиш тэргүүтэй есөн байцаагчийг ажлаас нь халсан. Тэд тухайн үед “О.Магнай дарга хууль бусаар ажлаас халах тушаал гаргасан учир Үндсэн хуулийн цэц, Төрийн албаны зөвлөлд хандана” хэмээн мэдэгдсэн билээ.
Тэгвэл Төрийн албаны зөвлөл хуралдаж, тэдний гомдол үндэслэлтэй эсэхийг шалгасан Маргаан хянан шалгах комиссын дүгнэлтийг хэлэлцсэн байна. Хуралдаанаар ШӨХТГ-ын дарга О.Магнайн есөн байцаагчийг нэг дор ажлаас халсан тушаалыг хүчингүй болгох шийдвэр гаргажээ. Маргаан хянан шалгах комисс Н.Гантөмөр тэргүүтэй байцаагчдыг албан үүргээ хангалтгүй биелүүлсэн гэж ажлаас халсан үндэслэл нь тодорхой бус, төрийн захиргааны албан хаагчийн ёс зүйг зөрчсөн тухай Ёс зүйн хорооны дүгнэлт гаргаагүй гэж үзсэн байна.