Чингэлтэй дүүргийн шүүхээс Лениний музейн барилгыг МАН-аас авч төрийн өмчид албадан шилжүүлэх шийдвэрийг гаргасан билээ. Энэ талаар Төрийн өмчийн хорооны дарга Д.Цогтбаатар хэвлэлийнхэнд мэдээлэл өгөхдөө, “Шүүхийн шийдвэр төр өөрийнхөө юмыг авах ёстой гэсэн шийдвэр гаргасан. Хариуцагч тал буюу МАН-ынхан шүүхийн шийдвэрийг одоогоор эсэргүүцэнэ гэж мэдэгдээгүй байна. Тэгэхээр хүлээн зөвшөөрч байгаа гэж ойлгож байгаа” гэсэн юм.
Шүүхийн шийдвэрийг МАН-д танилцуулжээ. МАН-ын зүгээс одоогийн байдлаар ямар нэгэн байр суурь илэрхийлээгүй байгаа гэж байна. Хэрэв МАН-ынхан энэ барилгыг хүлээлгээд өгвөл Төрийн болон орон нутгийн өмчийн тухай хуулийн дагуу барилгыг хүлээлцэж төрийн өмчид бүртгэхэд бэлэн байгаа гэдгээ Төрийн өмчийн хорооны удирдлагууд мэдэгдэж байна.
Ийн МАН-ынхан байраа суллаж өгвөл аль болох түргэн шуурхай ажиллаж, засвар үйлчилгээ хийж, Үлэг гүрвэлийн музейг байгуулах болно гэдгээ ч холбогдох хүмүүс хэллээ.
Цаашлаад тус музейн үзмэрүүдийг бүртгэх ажлыг өмнөх бүртгэлтэй нь тулгаж хүлээж авах аж. Одоогоор үзмэрийг хүлээж авах бэлтгэл ажил хангагдаж байгааг хэллээ.