“Америкийн шүтээн”-ий шүүгч, продюсер Саймон Ковеллын хүүхдийг тээж байгаа Лорен Силверман хэмээх бүсгүй түүнээс өөртэйгөө гэрлэхийг мөн телевизийн шоутай болгож өгөхийг шаардсан гэнэ. Энэ шаардлагуудыг нь гүйцэлдүүлэхээс нааш Саймоныг хүүхэдтэйгээ холбоотой байх эрх өгөхгүй хэмээн тэр сүрдүүлжээ.
Лорен бол Саймоны сайн найз, Нью-Йоркийн үл хөдлөх хөрөнгийн худалдаачин Эндрью Силверманы эхнэр юм. Лорен нөхрөөсөө албан ёсоор салаагүй байхдаа Саймонтой учир ургуулж, одоо хүүхдийг нь төрүүлэхээр болоод буй.  
Гэхдээ тэрээр Саймон Ковеллтой гэр бүл болохоос өмнө одоогийн гэр бүлээ цуцлуулах хууль шүүхийн том даваа бий.  Нью-Йоркийн нэлээн бийлэгжүү гэр бүлийн эзэгтэйн хувьд тэрээр нөхөртэйгөө хөрөнгөө хуваах асуудлаа хууль шүүхийн туслалцаатайгаар шийдвэрлүүлэхээр аль аль талаасаа шүүхэд гомдол гаргаад байгаа аж.

 Саймоныг найзаа гэж бодож явтал эхнэрийг нь булаасныг Эндрью Силверман зүгээр өнгөрүүлэхгүй гэдгээ шүүхэд гаргасан гомдлоор харуулжээ. Тэрээр өргөдөлдөө Саймоны нэрийг дурдаад, эхнэр нь түүнтэй амрагийн холбоо үүсгэсэн нь харгис хэрцгий, хүнлэг бус явдал хэмээн гомдоллож. Нэгэнт шүүхэд гаргасан гомдолд гэр бүл үймүүлсэн, гэр бүлдээ үнэнч бус хандсан гэж дурдсан учир Саймон Ковелл хэзээ нэг өдөр шүүхийн өмнө очиж, найзынхаа эхнэртэй учир ургуулснаа тайлбарлах ёстой гэсэн үг.

Хэвлэлүүдийн бичиж буйгаар Саймон Лорентой асуудлаа чимээгүй шийдсэний дараа хүүхэдтэй болсон тухайгаа нийтэд зарлах гэж байсан ч Лорен олны танил болж, шуугиан дэгдээхийг хүссэн бололтой өөрийнхөө жирэмсэн болсон тухай мэдээллийг хэвлэлээр дэлгэж орхижээ. Тэрээр телевизийн шоугаар мэргэшсэн Саймоныг ашиглан Кардашианыхан шиг реалити шоутай болгож өгөхийг шаардсан ч өнөөх нь татгалзсан учир уурандаа хувийн амьдралаа дэлгэсэн бололтой.