АНУ-ын Канзас мужийн Оверленд-Паркт бүдүүн модны үндэс рүү ухаж хийсэн нэгэн жижигхэн байшин бий болжээ. Жижигхэн хөөрхөн хаалгатай, дотор тасалгаандаа яг таарсан тавилга, сандал ширээ төдийгүй жижигхэн сав суулга, хивсэнцэр дэвсгэр хүртэл бий гэнэ. Улаан будгаар будсан хаалганы дэргэд шуудангийн хайрцаг ч байгаа.
         
Хэвлэлийнхэн энэ талаар сонирхож сураглахад хэнд зориулж, хэн ийм зүйл бүтээсэн нь олдоогүй байна. “Харамсалтай  бидний зочлоход анахай өөрөө эзгүй байлаа” гэж орон нутгийн сурвалжлагч бичжээ. Хотын эрх баригчид ч үүнийг хэн хийснийг мэдэхгүй гэдгээ хэлжээ.
         

Одоо хотынхон үүнийг ихэд сонирхож тийш олны хөл тасрахгүй байгаа гэнэ. Зарим хүн үнэхээр одой хүн, ямх охин  гэж байдаг юм биш байгаа гэж эргэлзэхэд хүрч байгаа юм байх. Сэтгэл нь хөдөлсөн нэгэн эмэгтэй бүр “Миний охин хаалганых нь дэргэд хэдэн чихэр тавьсан, хоёр цаг өнгөрөөд ирэхэд алга болчихсон байсан. Тэнд үнэхээр ямх охин амьдардаг юм билээ” гэж хөөрчээ.