Дэлхийн хөгжмийн ертөнц, тэр тусмаа жилийн шилдэг уран бүтэлч шалгаруулдаг MTV наадмын түүхэнд байгаагүй дуулиан тарьсан хүмүүс бол мэдээж Майли болон шинэ залуу од Робин Тек байсан гэдэгт гайхах хүн гарахгүй биз ээ. Мэдээж тэр өдрөөс хойш сэтгүүлчид, элдэв хов живд дуртай хүмүүс тэднийг тайван байлгахгүй нь ойлгомжтой. Тэдний энэ үйлдлийг “зоригтой алхам”, “хэн хүний чадахгүй солиотой байсан” гэж үзэх нэг хэсэг байгаа ч Майлиг энгийн даруухан Ханна Монтанагийн охин дүрээр нь дассан хүмүүс ихээр дургүйцэж хүлээж авсан. Энэ хүмүүсийн тоонд Робины ээж ч багтаад “ийм үзүүлбэр байдаггүй юм” хэмээн ширүүхэн мэдэгдээд авсан. Энэ бүхний эцэст гол эзэн маань өөрийнхөө бодлыг олон нийтэд цацсан нь давхар дуулиан тарьж орхилоо. Диснейгийн бяцхан охин хэлэхдээ: “Бидний эргэн тойронд хүн бүрт таалагдах ёстой гэдэг өчүүхэн бодолтой хүмүүс олон бий. Гэвч би тийм хүн биш. Яагаад энэ явдлыг зүгээр л шоуны нэг хэсэг байсан гээд хүлээгээд авчихаж чадахгүй байгаад гайхаж сууна. Би ганцаараа ийм зүйл хийгээгүй. Та Мадонна, Бритнигийн тарьсан дуулианыг санаж байгаа биз дээ. Үнэндээ хүн бүр л энэ жилийн VMA дээр хэн яах бол гээд хүлээдэг болчихсон шүү дээ. Бидний талаар одоог хүртэл хүмүүс шуугиж байна. Тэгэхээр бид түүх бүтээсэн” гэжээ.