УИХ-ын гишүүн асан Ц.Сэдванчиг сонгуульд ялагдал хүлээснийхээ дараа хэсэг хугацаанд гэртээ суусан. Тэр үед нь “та ямар ажил хөдөлмөр эрхэлж байна. Юу хийхээр зэхэж байна вэ” гэж асуухад, “Нам маань нэг юм бодож байгаа байлгүй дээ. Нам нэг ажил хий гэвэл түүнийг нь хийнэ дээ. Одоохондоо амралтын байдалтай байна” хэмээн хариулж байв.
Түүний хэлснээр нам нь “Эрдэнэс-Оюутолгой” компанийн захирлаар ажлуулсан. Гэвч түүнийг Рио Тинто руу захидал бичсэн гэдэг шалтгаанаар Ерөнхий сайд Н.Алтанхуяг суудлаас нь буулгах шийдвэр гаргаж, түүний оронд Да.Ганболдыг томилсон билээ. Үүний дараа Ц.Сэдванчиг, “Би тэр захидлыг бичсэн нь болсон юм. Оюутолгойн гэрээнд өөрчлөлт оруулах  боломжийг бүрдүүлж өглөө. Тэр захидлыг би бичээгүй бол өөр хэн нэгэн бичих л байсан. Би тэр захидлыг Ерөнхий сайдын зааврын дагуу бичсэн” гэж хэвлэлд ярилцлага өгсөн байв.
Ийнхүү Ерөнхий сайдын зааврын дагуу ажилласан ч ажлаасаа “хусагдсан” Ц.Сэдванчиг сүүлийн үед амралтын байдалтай, хувийн бизнесээ амжуулахын хажуугаар хүүхдийнхээ хүүхдийг хардаг ажилтай болоод байгаа бололтой. Тэрээр ачаа тэвэрсэн зургаа фэйсбүүк хуудсандаа нийтэлжээ.