Сирийн босогчид Испанийн хоёр сэтгүүлчийг ямар ч болзол тавилгүйгээр гурван сар гаруйн турш барьцаалж байгаа тухай “El Mundo” сонин мэдээлж байна. Испанийн сонины сурвалжлагч, зурагчин хоёрыг босогчдын армийн хүмүүсийн хамт Сирийн хилийг гарч Турк руу орох гэж байхад нь “Аль Кайда” бүлэглэлтэй холбоотой ажилладаг бүлэглэлийнхэн саатуулан барьцаалжээ. Тэднийг Засгийн газрын талд тагнуул хийж байж болзошгүй гэж баривчилсан тухайгаа мэдэгдсэн ч суллахын тулд ямар шаардлага биелүүлэх талаар ганц ч үг дуугараагүй аж. Гэтэл энэ оны есдүгээр сард Испанийн “El Periodico” сонины бас нэгэн сэтгүүлч химийн зэвсэг хэрэглэсний ул мөрийн талаар мэдээлэл цуглуулахаар яваад мөн л босогчдод олзлогдсон байна.
Сирийн албан ёсны Ерөнхийлөгч Башар Асадын эсрэг өрнөдийн орнууд байлдааны ажиллагаа явуулахаас татгалзсаны дараагаар босогчдын дунд хагарал үүсээд байгаа аж. Тэд Женевт болох хэлэлцээр дээр хэн нь эрх баригчидтай хэлэлцээр хийх эрхтэй, хэлэлцээр амжилттай болсон тохиолдолд тус бүр ямар эрх мэдэл албан тушаалтай болох талаар хоорондоо ихээхэн зөрчилтэй байгаа юм байна.