АНУ-ын Ерөнхийлөгч Б.Обама гэр бүлийн хамт Өмнөд Африкийн удирдагч агсан Нельсон Манделаг сүүлчийн замд нь үдэх ёслолд оролцсон. Өнөө цаг үеийн хамгийн агуу хүмүүсийн нэг байсан Н.Манделатай салах ёс гүйцэтгэхээр Б.Обамагаас өмнөх гурван ч экс Ерөнхийлөгч Өмнөд Африкт ирсэн юм. Экс Ерөнхийлөгч Жимми Картер, Билл Клинтон нар тусдаа онгоцоор ирсэн бол Жорж Бушийн гэр бүл, мөн хатагтай Хиллари Клинтон нар Ерөнхийлөгчийн онгоцоор Иоханнесбургт ирсэн ажээ. Өөрөөр хэлбэл, АНУ-ын Ерөнхийлөгчийн онгоцоор хоёр Ерөнхийлөгч, гурван тэргүүн хатагтай зэрэг зорчсон ховор тохиолдол болжээ. Бүхэл бүтэн 17 цаг үргэлжлэх урт нислэгийн үеэр лидерүүдийн гэр бүл тухтай яриа өрнүүлж, Ж.Буш албанаасаа бууснаас хойш хөгжүүлж буй зургийн хоббигоо тэргүүн хатагтай нарт сонирхуулжээ.