Хятадын жүжигчин Жан Зиеи жил гаруйн өмнө хэвлэлээр тарьж шуугиан тариад байсан мэдээлэл худлаа болохыг баталж, нэр төрөө цэвэрлэв. Түүнийг Хятадын Коммунист намын өндөр албан тушаалын хүмүүст асар өндөр үнээр биеэ үнэлдэг гэсэн цуу яриа хэвлэлээр тарсан юм. Тухайлбал, “Boxun News” цахим хуудаст түүнийг 100 сая ам.доллараар улстөрчидтэй дотно харилцаа тогтоосон хэмээн бичсэн юм. Гэвч Жан Зиеигийн гомдлын дагуу хуулийн байгууллага шалгахад тус вебсайтад мэдээлэл өгсөн эх сурвалж үнэн гэдгийг баталж чадаагүй байна. Нэгэнт худал мэдээлэл цацсан нь тогтоогдсон тул “Boxun News” цахим хуудас жүжигчнээс хүлцэл өчжээ.
“Гейшагийн дурсамж”, “Хүрхрэх бар, нуугдах луу” зэрэг киногоороо Хятад төдийгүй барууны орнуудад танигдсан Жан Зиеигийн талаар улсынх нь дотоодын хэвлэл үнэн худал нь эс мэдэгдэх дуулиан шуугиан тасралтгүй гардаг. Тэрээр өнгөрсөн онд Хонконгийн “Next Media” хэмээх хэвлэлийн компанийн эсрэг шүүхэд гомдол гаргаж, мөн заргаа авч байсан юм.