Их Британийн Ерөнхий сайд асан Маргарет Тэтчерийн 1980-аад оны өдрийн тэмдэглэл нийтэд ил болжээ. Уг тэмдэглэлээс харвал төмөр хатагтай ажлын маш завгүй хуваарьтай нэгэн байжээ. Тэрээр 10 гаруй жил Ерөнхий сайдын албыг хашихдаа бараг амардаггүй байжээ. Амралтаа аваад хилийн чанадад явсан ч тэндэхийн улстөрчид, бизнесийнхэнтэй байнга уулзаж явсан нь өдрийн тэмдэглэлд нь үлджээ. Түүний өдрийн тэмдэглэлээс бас нэг сонирхол татах зүйл байсан нь хатагтай Тэтчер гурван өдөрт нэг удаа үсчинд ордог байжээ. 1984 оны тэмдэглэлийг бүтэн шүүж үзвэл тэрээр 118 удаа үсчинд орсон тухай цагийн хуваарийг нь тэмдэглэсэн байж. 1979 онд Ерөнхий сайд болсноос хойш 11 жил Засгийн газар тэргүүлэх хугацаанд төмөр хатагтайн үсний засалт бараг өөрчлөгдөөгүй билээ. Ингэж дүр төрхөө хадгалахад нь гурван өдөр тутам ордог байсан үсчин тусладаг байсан бололтой.