Хоёр оны зааг дамжаад АНУ-ын нутгаар их хэмжээний цас орж хүйтэрснээс 16  хүн хөлдөж үхэн Нью-Йорк, Коннектикут, Массачусетс болон Миннесота мужуудад нийтийн тээврийн үйлчилгээ зогсч, сургуулиудыг хаагаад байгаа. Одоо энэ бүс нутагт хүйтний эрч 35 градусаас даваад байгаа ч агаарын илүү хүйтэн урсгал зүүн эргийн бүс нутгийг чиглэн ирж байгаа гэж цаг уурын албаныхан мэдээлж байна. Эрх баригчид онцын шаардлагагүй бол иргэдийг гэр орноосоо гарч явахгүй байхыг анхааруулж байна.

“Сүүлийн хэдэн арван жилд болж байгаагүй тийм хатуу өвөл болж байна” гэж Үндэсний цаг уурын албаны мэдэгдэлд дурдсан байна. Хамгийн сүүлд 1994 онд ингэж хүйтэрсэн ч өнөөгийнх шиг ингэж өдөр дараалан хүйтэн байгаагүй юм гэж тус албаны ажилтан Боб Оравек хэлжээ.