Нийтийн тээврийн салбарынхан тасалбарынхаа үнийг өнөөдрөөс жигдэллээ. Өөрөөр хэлбэл, нийслэлийн болон төрийн өмчит автобус компанийн удирдлагууд өчигдөр хуралдаж, том оврын автобусаар том хүн 500, троллейбус 300, хүүхэд 200 төгрөгөөр зорчуулах албан ёсны шийдвэр гаргажээ. Өдөржин хуралдсан эл хурлаар нийтийн тээврийн салбарын алдагдал нэмэгдэх бүрийд төрөөс нөхөн олговор олгож ирсэн ч, байдал дээрдэхгүй байгаа тул тасалбарын үнийг нэмье гэх нэгдсэн шийдэлд хүрсэн гэнэ. Нөгөөтэйгүүр, том оврын автобусаар үйлчилгээ эрхлэгчдийн холбооны гишүүнчлэлтэй 20 гаруй компани аль хэдийнэ тасалбарынхаа үнийг нэмсэн учраас жигдлэх нь зөв гэж үзсэн байна. Тэгэхдээ НТГ-аас хийсэн тооцоо судалгаанд үндэслэн бодит үнийг тогтоосон хэмээн албаныхан хэллээ.