Монголын Залуучуудын Холбооноос залуучуудын амьдрал, нийгэм, соёл хөгжлийн асуудлыг цогцоор нь шийдвэрлэвэл зохих 27 ажлын жагсаалтыг МУ-ын Засгийн газрын тэргүүн Н.Алтанхуягт хүргүүлсэн билээ. Тэгвэл дээрх жагсаалтад тусгасан “Залуу зохион бүтээгчдийн ордон”-г  сэргээж, үндсэн зориулалтаар нь эргүүлэн ашиглах саналыг УИХ-ын дарга З.Энхболд хүлээж авсан бололтой. Тэрээр үндэсний телевизийн нэгэн нэвтрүүлэгт оролцохдоо “Залуу техникчдийн ордон”-г хүүхэд, залуучууддаа буцааж өгнө гэдгээ амлаад “Улс орныг инженерүүд нь авч явдаг. Яагаад гэвэл, сайн инженертэй улс хөгжиж байна. Бид инженерүүдээ дээш нь гаргаж ирэхгүй бол улсын хөгжил урагшлахгүй. Өөрийнхөө инженерүүдэд сайн цалин өгөхгүй бол өөр улс орны инженерийн хийсэн юмыг л худалдаж авна. Тиймээс “Залуу техникчдийн ордон”-г буцаан өгөх тухай асуудал яригдаж байгаа” гэсэн юм.