Харангын хэмээн хамтлагаараа овоглосон дуучин Х.Лхагвасүрэнгийн бие даасан цомог “Монгол ээж” хэвлэлтэд шилжжээ. Цомогт эхийн тухай дуунууд багтсанаас гадна маш олон онцлох сонин зүйлээр дүүрэн бүтээл болж чадсан гэдгийг дуучин хэлж байна. Жишээ нь, цомгийн хавтасны зураг нь  урлагийг ивээгч Янжинлхам бурхны хөрөг бөгөөд Ардын жүжигчин, Хөдөлмөрийн баатар, Төрийн шагналт хөгжмийн зохиолч Д.Лувсаншарав зурсан гэдгийг дуучин фейсбүүк хуудсаараа дамжуулан зарлалаа. Өдгөө 80 нас хүрэх гэж яваа буурайг хөгжмийн зохиолч, найрал дууны удирдаач гэдгээр нь хүмүүс сайн мэдэх ч түүнээсээ дутахгүй зурдгийг нь төдийлэн мэддэггүй билээ. Тэрээр 75 наснаасаа хойш дуучин Х.Лхагвасүрэнтэй хуурай ах дүүс бололцож, эвтэй дөрвөн амьтан зурж, дурсгаж байсан гэнэ.