Төрийн албан хаагчдын халаасанд дураараа гар дүрж, цалин хөлснөөс нь хумсалдаг удирдлага Говь-Алтай аймгийн Тонхил суманд байна. Тухайлбал, тус сумын Засаг дарга Х.Болд Улаанбаатар хотод нутгийн зөвлөлийн золголт зохион байгуулахын тулд суманд ажиллаж, амьдардаг төрийн албан хаагчдын нэг өдрийн цалинг өөрсдөд нь мэдэгдэлгүйгээр авчээ. Энэ нь Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 17 зүйлийн 2,3 дахь заалтад зааснаар “Төрийн албан хаагчдын нэг өдрийн цалинг өөрсдийн зөвшөөрөлгүйгээр хууль бусаар хурааж авахыг хориглоно” гэсэн зүйл заалтыг зөрчиж байгааг төрд алба хашиж байгаа хүмүүс ярьж байна.
Тэрчлэн Засаг дарга Х.Болдын дураараа авирлаж, төсвийн хөрөнгөөр тоглож буй хууль бус үйлдэл цөөнгүй гэдгийг ч нутгийнхан хэлж байна. Төрөөс Орон нутгийн хөгжлийн санд хэмээж мөнгө хуваарилдаг. Энэ мөнгөөр сум орондоо, нийтэд зориулсан зүйлийг хийх учиртай. Гэтэл Засаг ноён Х.Болд эл сангийн хөрөнгийг хууль бусаар зарцуулж, шамшигдуулсныг ч холбогдох хүмүүс хэлж байгаа юм. Түүний эл үйлдэл нь Төсвийн тухай хуулийн 25-р зүйлийн 10 заалт буюу Орон нутгийн хөгжлийн сангийн хөрөнгийг оновчгүй үр, дүнгүй зарцуулахыг хориглох тухай заалтыг зөрчиж байгаа гэж үзжээ. Энэ мэтчилэн нутгийн зөвлөлийн золголт зохион байгуулах нэрээр төрийн албан хаагчдын цалинг дур мэдэн авч, сум оронд хуваарилагдсан мөнгийг хууль бусаар зарцуулдаг Засаг даргыг огцруулах нь зүйтэй гэдэгт тус сумын Иргэдийн хурлын төлөөлөгчид санал нэгдээд байгаа гэнэ.