МАН-ын лидрүүд МАХН-ын гишүүнчлэлээ сэргээх гэж байна гэж дуулиан шуугиан болсны эцэст өнөөдөр МАН-ын 200 орчим гишүүд МАХН-ын гишүүнчлэлээ сэргээж, батлахаа гардан авлаа.
Гэхдээ хэвлэл мэдээллээр цацагдаад байгаа шиг МАН-ын лидрүүд харагдсангүй.
Батлах гардуулах ажиллагаанд МАХН-ын дэд дарга Д.Тэрбишдагва, Ерөнхий нарийн бичгийн дарга Г.Шийлэгдамба, Сангийн сайд Ч.Улаан, Байнгын хорооны дарга Ц.Цолмон, Байгаль очин, ногоон хөгжлийн дэд сайд Б.Тулга, нарийн бичгийн дарга Г.Бямбасүрэн, Ерөнхий нарийн бичгийн даргын зөвлөх Дугаржав нар оролцов. Намын батлахаа гардан авсан 200 хүний дунд МАН-ын нөлөө бүхий хэд хэдэн гишүүн байгаа тухай намын Ерөнхий нарийн бичгийн дарга Г.Шийлэгдамба ярьсан юм. Харин эдгээр иргэдийн нэрийг нь зарлахаас зайлсхийж байгаа аж. Энэ талаар Г.Шийлэгдамба “Нэртэй улстөрч, олны танил хүмүүс МАХН-ын гишүүнчлэлээ сэргээнэ гэсэн мэдээлэл үнэн бодитой. Гэхдээ эдгээр хүмүүсийн нэрийг эрт зарлах боломжгүй. Учир нь үүний дараа намын дотор хагарал үүсгэж, үйл ажиллагааг нь мушгин гуйвуулах, эсрэг үйл ажиллагаа явуулах, гишүүнчлэлээ сэргээж байгаа хүмүүст хүндрэл учруулах гээд бэрхшээл гарахгүй гэх баталгаа байхгүй учир бид ийнхүү сэргийлж байгаа юм” хэмээн ярилаа.
Ийнхүү Шинжлэх ухааны гавьяат зүтгэлтэн, доктор, профессор Ж.Амгалан, Хөдөлмөрийн аюулгүй байдал, эрүүл аухйн мэргэжлийн сургалтын төвийн захирал Л.Дашням, Сонгинохайрхан дүүргийн ИНХ-ын дарга Я.Должинсүрэн зэрэг 200 орчим хүн МАХН-ын батлахаа гардан авав.
