Манай улсад гурван хүн тутмын нэг нь гэр бүлийн хүчирхийлэл, дарамтад өртдөг гэх  судалгааг мэргэжилтнүүд гаргажээ. 2010 оноос хойш 41 эмэгтэй гэр бүлийн хүчирхийллийн улмаас нас барсан бол 1800 гаруй эмэгтэй бэртэж, гэмтэн эрүүл мэндээрээ хохирсон гэжээ. Харин үүний цаана хэдэн хүүхэд бэртэж гэмтсэн талаарх тоо баримт тодорхойгүй.

Өөрөөр хэлбэл, цөөн хүн амтай манай улсад гэр бүлийн хүчирхийлэл их төдийгүй хуулийнх нь хэрэгжилт ч муу байгааг дээрх баримт харуулна. Манайхны олонхи нь хөрш айл, найз нөхөд, хамаатан садангийнд нь гэр бүлийн хүчирхийлэл үйлдэгдэж байхад харсан ч хараагүй мэт, сонссон ч сонсоогүй мэт өнгөрдөг.
“Эр, эмийн хооронд илжиг бүү жороол” гэх үгээр халхавчлан хувиа бодсон сэтгэхүй зонхилсон нь ч нийгэмд гэр бүлийн хүчирхийллийг улам дэвэргэхэд хүргэдэг байна. Нөгөө талаар, эрх зүйн харилцааг нь зохицуулах Гэр бүлийн хүчирхийллийн тухай хууль учир дутагдалтай, бусад хуультай хамгийн уялдаа муутай нь гэхэд буруудахгүй. Шүүхээс хүчирхийлэл үйлдсэн нөхрийн эрхийг хязгаарлах шийдвэр гаргалаа гэхэд нь хэрхэн биелүүлэх, хэн хяналт тавих талаар энэ хуульд тусгаагүй байх жишээтэй. Гэр бүлдээ эдийн засаг, сэтгэл зүй, эрүүл мэндийн дарамт үзүүлсэн хүнийг цагдаа, нийгмийн ажилтнууд зан үйлд нөлөөлөх сургалтад хамруулна гэсэн заалт байдаг ч хаана, хэрхэн хамруулах нь мөн л тодорхойгүй аж.

Иймд ХЗЯ-наас Гэр бүлийн хүчирхийлэлтэй тэмцэх тухай хуулийн шинэчилсэн найруулгын төсөл боловсруулжээ. Төслийн ажлын хэсгийн гишүүн, хуульч Н.Алтантариагаас ямар өөрчлөлт орж байгааг тодруулахад, “Шинэ хуулийн төсөлд гэр бүлийн хүчирхийлэлтэй тэмцэх зөвлөл гэх байгууллага байна гэж тусгасан. Энэ нь, орон нутагт салбар зөвлөлтэй байна. Салбар зөвлөл нь анхан шатны нэгжид хүрсэн цагдаа, эрүүл мэндийн байгууллага, нийгмийн ажилтан, Засаг дарга зэрэг мэрэгжилтнээс бүрдсэн баг ажиллуулна. Өөрөөр хэлбэл, хохирогч хамгийн ойр анхан шатны нэгжээс үйлчилгээ авах боломжтой болгож,  үйлчилгээний төрлийг хуульчилж өгсөн. Мөн хамрах хүрээг нь  өргөжүүлсэн. Учир нь, одоогийн мөрдөж буй хууль салсан эхнэр нөхөр, хамтран амьдрагч нарт үйлчилдэггүй. Гэрлэлтээ цуцлуулсан л бол гэр бүлийн хүчирхийллийн эсрэг хуулийн хамгаалалтыг та авах боломжгүй гээд орхидог. Харин шинэчилсэн төсөлд салсан эхнэр нөхөр, хамтран амьдрагч байсан энэ хуулиар хамгаалагдах эрхтэй” гэв.

 Одоо мөрдөж байгаа хуульд хамтран амьдарч байгаад салсан ч хүүхэддээ эцэг тогтоолгож, тэтгэмж авах боломжтой гэж заасан байдаг ч өрх толгойлсон эмэгтэйчүүдийн 80 гаруй хувь нь ямар нэг тэтгэмж авалгүй ганцаараа хүүхдээ өсгөдөг байна. Тэгвэл Гэр бүлийн хүчирхийллийн тухай хуулийн шинэчилсэн найруулгад хүүхдээ тэжээн тэтгэхээс зайлсхийх асуудлыг ч тусгасан гэнэ. Боловсруулаад дуусах шатандаа яваа уг хуулийн шинэчилсэн найруулгыг УИХ-ын хаврын чуулганаар хэлэлцүүлэхээр төлөвлөснөө ажлын хэсгийнхэн энэ үеэр хэлж байлаа. Хууль  сайжрууллаа гээд маргааш нь бүх зүйл сайхан болчихгүй, нийгмийн хандлага, сэтгэхүйг өөрчилж байж үр дүнд хүрнэ. Ингэхийн тулд 40, 50 жил ч шаардагдаж болох юм гэдгийг мэргэжилтнүүд онцолж байв. Ямартай ч, цөөхөн монголчууд гэр бүлийн хүчирхийллийг өөгшүүлэхгүй, асуудалд нухацтай хандах цаг нэгэнт иржээ.