Зүүн аймгийн зарим сумдад тархсан байгалийн гоц халдварт шүлхий өвчнөөр өвчилсөн малын тоо нэмэгдсэн гэх мэдээлэл гарах болсон. Бодит байдал ямар байгааг Мал эмнэлгийн үржлийн газрын дэд дарга П.Болортуяагаас тодрууллаа.

-Шүлхийгээр өвчилсөн малын тоо нэмэгдсээр байгаа гэсэн. Энэ үнэн үү?
-Байдал харьцангуй намжсан ч, нэмж мал өвчилж байна. Тухайлбал, Дорноговь аймгийн Даланжаргалан суманд тархалт нэлээд идэвхтэй байгаа. Өчигдөр /уржигдар/ гэхэд нэг үхэр нэмж өвчилсөн. Мөн зарим нэг шинжилгээгээр хонь, ямаанд ч эерэг хариу гарлаа.
-Вакцинжуулах ажил хэр явж байна вэ?
-1.9 сая мал вакцинжуулах ёстойгоос өнөөдөр 90 гаруй хувийг нь хамруулаад байна. Үлдсэн малаа энэ долоо хоногт бүрэн хамруулна.
-Малын шүлхий өвчин давталттай гардаг уу.  Вакцин тариулсан мал хэдэн жилдээ энэ өвчнөөр өвчилдөггүй юм бэ?
-Зургаан сар байдаг. Өнгөрсөн аравдугаар сард вакцин хийлгэсэн малын дархлаа одоо суларч эхэлж байна гэсэн үг.
-Шүлхий гарах шалтгааныг судалж үзсэн үү. Зээрээс халдвар дамжсан гэдэг нь батлагдсан уу?
-Зээрээс халдвар тархсан байх магадлалтай ч бид батлаагүй. Судалж шинжилж байгаа.
-Өнөөгийн байдлаар хэдэн мал устгаад байна вэ?
-Надад ирсэн мэдээллээр 3387 мал булж устгасан. Одоо нөхөн олговрын асуудал яригдана.