Алжирын Гардайя хотод бербер ба араб үндэстэн хоорондын мөргөлдөөн болж хүний амь үрэгдэж, олон хүн шархадсантай холбоотойгоор Засгийн газар нь тус хот руу 10 мянган цагдаа илгээжээ. Цагдаа нар үндэстэн хоорондын мөргөлдөөнийг зогсоох, үймээнээр далимдуулан газар авч байгаа дээрэм, тонуулыг зогсоох, иргэдийн амгалан байдлыг хамгаалах үүрэгтэй.
Цагдаа нар хотын гол зам, хүн олноор цуглардаг цэгүүдэд үйл ажиллагаа явуулаад эхэлжээ. Одоогоор Гардайя хотод дунд сургуулиуд хаалттай, олон газар мөргөлдөөнд оролцогчид томоохон хориг бэхлэлт байгуулсан байдалтай байна.
Гардайя хотод хэдэн өдрийн турш үргэлжилсэн мөргөлдөөний үеэр гурван хүн амь үрэгдэж, 200 гаруй хүн шархаджээ. Тус хотод үндэстэн хоорондын ийм мөргөлдөөн ойр ойрхон гардаг бөгөөд сарын өмнө яг ийм мөргөлдөөн үүсэхэд арай л гэж намжааж байсан аж.
Сүүлийн үед Алжирт Ерөнхийлөгчийн сонгууль эхлэх гэж байгаатай холбоотойгоор байдал нэлээд түгшүүртэй байгаа юм.