Нийслэлийн Засаг дарга бөгөөд Улаанбаатар хотын захирагч, Нийслэлийн АН-ын дарга Э.Бат-Үүл өнгөрсөн бямба гарагт Чингэлтэй дүүргийн 19 дүгээр хорооны иргэдтэй уулзаж, нийслэлд хийж буй ажлуудаа танилцуулан, тэдний сонирхсон асуултад хариулт өглөө. Уулзалтад Чингэлтэй дүүргийн Засаг даргын орлогч Б.Батхуяг, тус дүүргээс НИТХ-ын төлөөлөгчөөр сонгогдсон Л.Наранбаатар болон дүүргийн ИТХ-ын төлөөлөгчид оролцлоо.
Нийслэлийн АН, Чингэлтэй дүүргийн АН хамтарч 117 дугаар сургуульд зохион байгуулсан энэ уулзалтад тус хорооны 150 орчим иргэн оролцов. Тэд хотын даргад хандан ихэвчлэн амьдарч буй орчноо ая тухтай болгох, тогтмол орлоготой иргэдийг орон сууцжуулах хөтөлбөр, хог хаягдлын менежмент, хогны ууттай холбоотой асуулт тавьж байв. Тухайлбал, хогны ногоон уут үйлдвэрлэхэд зарцуулж буй мөнгөөр сургууль, цэцэрлэг барьж болдоггүй юм уу гэсэн иргэний асуултад хотын дарга Э.Бат-Үүл “Би гэр хорооллын иргэдтэй уулзалт хийж “Хогны ууттай болгоё, хогны уут тараах уу”  гэхэд бүгдээрээ алга ташин дэмжиж хүлээж авсан шүү дээ. Бүр “Азийн цагаан дагина” гэх нэрийг  хүртэл иргэдийн санал болгосноор өгсөн. Иргэдийн хувьд сар бүр хогны хураамж төлдөг.

Байрны өрхүүдээс 2000 төгрөг, гэр хорооллын өрхөөс 2500 төгрөгийг авдаг. Иргэдийн хувьд ийнхүү төлбөр төлснийхөө төлөө хогны уут авч байгаа. Хог хаягдлын менежментийн хүрээнд 9,7 тэрбум төгрөгийг хуримтлуулж байгаа. Сард нэг айлд 1415 төгрөгийн үнэ бүхий 15 уутыг тарааж байна. Өрхийн хураамж болгон өгч буй 2000, 2500 төгрөгийн 1415 нь ийнхүү хогны уут болон очиж, үлдсэн нь тээвэрлэлтийн зардалд зарцуулагддаг. Мэдээж, энэ мөнгөөр  сургууль, цэцэрлэг барих боломжгүй гэдгийг иргэд ойлгох хэрэгтэй” хэмээн хариулсан. Түүнчлэн иргэд 19 дүгээр хороондоо цэцэрлэг бариулах, засмал зам тавиулах, ундны усны худагтай болгох, цахилгааны хүчдэлийг нэмэгдүүлэх гэх мэт олон хүсэлтийг хотын даргад тавьж, ойрын хугацаанд шийдвэрлүүлж өгөхийг хүсч байлаа.  
Хотын Засаг дарга цаашид бусад дүүргийн хорооны иргэдтэй уулзаж, нийслэлд хийж хэрэгжүүлэх ажлаа танилцуулангаа, тэдэнд тулгамдаж буй асуудлыг тодруулж, шийдвэрлэхэд анхаарлаа хандуулж ажиллах юм.